Serija se nastavlja, Sutjeska se ne zaustavlja – sedmi meč u sezoni i sedma pobjeda. Ovog puta ekipa je do trijumfa došla protiv Šenčura (70:63) na startu “balona” ABA2 lige u Sarajevu.
Odličan, izvanredan početak u Sarajevu, pred nastavak “balona” u Bosni i Hercegovini. Slijede mečevi sa Širokim (petak od 15 časova) i Vrijednosnicama (nedjelja od 15 časova).
Početak utakmice je bio težak – Sutjeska je promašila neke otvorene šuteve, bilo je grešaka, Šenčur je vodio, ali je to bila prednost od najviše tri poena.
Od druge četvrtine kreće bolja igra u napadu. Sutjeska je napravila seriju 7:0 i povela 26:20 poslije poena Vladimira Tomaševića. U tim momentima razigrani su bili Miloš Popović i Miloš Vujović, pridružio im se i Tomašević, a konce igre je vukao i danas odlični Mašan Vrbica.
Ipak, slovenačka ekipa je bila uporna, non-stop disala za vratom, pa je prišla na 31:30, ali je Vrbica za dvije vezane trojke odveo Sutjesku na velikih šest poena prednosti – 38:32.
Na poluvremenu je bilo plus pet (38:33), da bi početak nastavka pripao rivalu, koji je serijom 8:0 preokrenuo i prvi put nakon prve četvrtine poveo – 41:40. Tada je Bogdan Bojić pogodio trojku i iznudio nesportski faul, Sutjeska se ponovo odlijepila, a kada je Vrbica u posljednjoj sekundi treće četvrtine pogodio trojku sa preko 10 metara za 57:46, bilo je jasno da ekipu ništa ne može zasutaviti ka novom trijumfu.
Početkom četvrte četvrtine Sutjeska je kompletirala seriju 8:o, otišla na maksimalnih 61:46 i dileme više nije bilo.
“Gledajući statistiku ne mogu da budem zadovoljan. Promašili smo 13 slobodnih bacanja u drugom poluvremenu, nedopustivo je šutirati slobodna bacanja 29/15. Imali smo dosta promašenih zicera, jedino je dobra pobjeda i sa tim možemo biti zadovoljni”, rekao je trener Sutjeske Darko Vujačić nakon utakmice.
Mašan Vrbica je meč završio sa 17 poena, pet skokova, sedam asistencija i indeksom 23. Miloš Koprivica je imao 16 poena i četiri skoka, a Miloš Popović 13 poena i osam skokova.
FOTO: Dragana Stjepanović